Багаи: Иран и Оман постигнаа договор за бродската рута низ Ормуска Теснина

Иран и Оман постигнаа договор за географските координати на новата бродска рута низ Ормускиот теснец, а заедничко соопштение е во завршна фаза на подготовка, изјави портпаролот на иранското Министерство за надворешни работи, Есмаил Багаеи.

Според Багаеи, преговорите меѓу Техеран и Мускат се одвиваат „професионално“ и двете страни постигнале заедничко разбирање за географските параметри на предложената рута. Тој додаде дека документот би можел наскоро да биде објавен, доколку процесот не биде попречен од трети страни, пренесе „Ројтерс“.

Сепак, Багаеи нагласи дека евентуалниот договор сам по себе нема да биде доволен за да ја гарантира безбедноста на пловидбата низ Ормускиот теснец – една од најважните светски поморски артерии за транспорт на нафта.

Според „Ројтерс“, предложениот договор би му овозможил на Иран поголема контрола врз бродовите што влегуваат во Персискиот Залив преку Ормускиот теснец. За агенцијата тоа го потврдиле висок ирански извор и двајца регионални функционери, оценувајќи дека станува збор за една од најзначајните дипломатски придобивки за Техеран во последните години.

И покрај напредокот во разговорите, истите извори ги отфрлија тврдењата на американскиот претседател Доналд Трамп дека договорот за повторно отворање на теснецот е непосреден, наведувајќи дека остануваат нерешени повеќе клучни прашања.

МИА