Aсфалтиран дел од патот до езерцето Калин Камен во Крива Паланка

Заврши реализацијата на проектот за изградба на општински пристапен пат од Ловечка куќа до Езерце, Калин Kамен.

 

Асфалтирани се два километра од вкупната должина на постојниот пат до месноста Езерце - Калин Камен кој изнесува три километри 104 метри.

 

- Асфалтирани се два километра од патот, финансираше АФПЗРР, а аплицираме како општина преку Североисточен плански регион. Со ова е овозможен побрз и полесен пристап до живописниот предел на Калин Камен и до езерцето, изјави градоначалникот Арсенчо Алексовски. 

 

По целата должина е ископан канал за одводнување, а долж главната траса на неколку локации се поставени бетонски цевки за одводнување. 

 

Алексовски потенцира дека во иднина ќе се вложува во урбанизација и промоција на локалитетот како туристичка дестинација.

 

- Во тек е и изработка на урбанистички план каде е предвидено да се градат викенд-куќи, ресторани и хотели, со што туризмот во овој крај ќе може да заживее, дополни Алексовски и најави асфалтирање на нови 700 метри од патот, проект кој ќе се аплицира преку Североисточниот плански регион, а ќе го финансира Биро за рурален развој.

 

Ова е еден од трите приоритетни патни правци изградени во општината годинава. Во село Жидилово е асфалтиран пат во должина од еден километар, а беше изгарден и комплетно нов пат со вкупна должина од околу 2,3 километри до манастирскиот комплекс Свети Јоаким Осоговски. За трите патни правци беа вложени околу 45 милиони денари.