Асад: Ослободувањето на Алепо е победа за сите

Oслободувањето на Алепо е победа не само за Сирија, туку и за сите, кои се борат против тероризмот, пред се за Русија и Иран, изјави денеска сирискиот претседател Башар ал Асад, јави ТАСС. 

Асад ова го изјави на средба со иранскиот заменик-министер за надворешни работи Хосеин Џабер Ансари, кој е во посета на Дамаск. 

Сирискиот претседател нагласи дека победите на бојното поле се важен чекор на патот кон ставање крај на тероризмот на целата територија на Сирија и создавање на поволни услови за прекин на војната.

Руските воздушни напади и милициите, поддржани од Иран одиграа клучна улога во извојувањето победа на сириските владини сили во Алепо, некогаш најнаселен сириски град и економски центар на земјата.

Се очекува последните бунтовници да го напуштат Алепо во следните 24 часа.

Над четири илјади борци се евакуирани од источниот дел на град во текот на изминатите 24 часа, соопшти Меѓународниот комитет на Црвениот крст.

Не е познато колку точно луѓе остануваат во бунтовничката енклава во Алепо, а МКЦК прогнозира дека евакуацијата ќе заврши утре.