Амбасада на САД во Скопје: Издавањето на визи ќе продолжи

Амбасадата на Соединетите Американски Држави во Скопје на својот Твитер профил соопшти дека нејзиниот сервис за пасоши и визи ќе продолжи да работи и покрај затворањето на американската влада.

„Закажаните сервиси за пасоши и визи и сервисите за итни случаи за граѓаните на САД ќе продолжат во амбасадата за време на затворањето на владата на САД. Нема да го обновуваме овој профил редовно, освен во итни случаи“, објави Амбасадата на Твитер.

Американската влада престана да работи откако остана без финансирање поради неможноста на републиканците и демократите да го договорат новиот привремен буџет.

Претходно ваква делумна парализа на федералната Влада имаше во октомври 2013 година и траеше 16 дена.

Сегашната криза ќе трае додека конгресмените не постигнат согласност за законот за буџетските расходи.