Адаптација на земјоделството кон климатските промени преку проект на УСАИД

Проектот на УСАИД за адаптација на земјоделството кон климатските промени денеска во струмичкото село Добрејци ќе организира теренска посета на насад со домати во сопственост на земјоделец кој е корисник на проектот.

- Проектот има за цел да ги собере земјоделците и советниците на АПРЗ (Агенција за поттикнување на развојот на земјоделството) на насад со домати во сопственост на земјоделец-корисник на проектот, за да ги едуцира како да се справат со проблемите што климатските промени ги предизвикуваат кај градинарските култури. На оваа локација проектот има поставено опитно поле каде беа аплицирани и тестирани неколку мерки за адаптација кон климатските промени како: УВ заштитни мрежи, добротворната габа триходерма харзианум и синтетички фолии како материјал за мулчирање, информира организаторот на настанот.

Овој проект на УСАИД почна да се спроведува во април 2012, од страна на Мрежата за рурален развој на РМ, со цел да им помогне на земјоделците да го зачуваат нивото на приход преку намалување на штетите предизвикани од промените во животната средина.

Проектните активности се фокусирани во медитеранската зона, вклучувајќи го Вардарскиот регион со делови од Струмичко и Гевгелиско - земјоделско богати области кои се под најголемо влијание од климатските промени.