20.000 евра казна за фирмата која нелегално фрлаше градежен шут во Долно Лисиче

При вонреден инспекциски надзор во скопско Долно Лисиче, на локацијата позната како „Купишта“, бил затекнат камион како незаконски одлага градежен шут, спротивно на Законот за управување со отпад.

Од Општина Аеродром информираа дека општинскиот инспекторат издал прекршочен платен налог за правното лице, согласно член 130 од Законот, а за прекршокот била изречена глоба од 20.000 евра во денарска противвредност.

Од општината велат дека ќе продолжат со засилени инспекциски контроли со цел спречување на загадувањето и создавањето диви депонии на нивната територија.

Воедно, упатен е апел до граѓаните и компаниите совесно да постапуваат со отпадот и да ги почитуваат законските прописи, бидејќи за несовесно однесување ќе следуваат санкции.