Преглед на вестите од светот

Израелската делегација, составена од безбедносни службеници, денес во Каиро со египетските посредници ќе разговара за прекин на огнот во Газа, јавуваат израелските медиуми. Делегацијата на Хамас го напушти Каиро доцна синоќа и „ќе се врати со писмен одговор на предлогот за примирје“, според египетски безбедносни извори. Во нивното соопштение се напоменува дека обезбедувањето траен прекин на огнот е основен камен-темелник за придвижување кон деталите на преговорите и успехот на договорот со Израел.

Разговорите меѓу двете страни се одржуваат под посредство на Египет. Израел го предложи последниот договор за прекин на огнот, предупредувајќи дека сега е „последната шанса“ за договор за примирје пред израелската армија да започне копнена операција во градот Рафа во јужниот дел на Газа, каде што се засолниле повеќе од 1,5 милиони Палестинци.

Инаку, Рафах беше погоден од воздух повеќе пати и, исто така, претрпе некои копнени напади, иако не толку обемни како оние што ги спроведе Израел во другите области на крајбрежната енклава.

Илјадници демонстранти се собраа во Тел Авив синоќа барајќи ослободување на околу 130 заложници кои сè уште се држат во Газа по шест месеци од почетокот на војната со Хамас. Демонстрантите се пресметаа со израелската полиција откако ги блокираа патиштата во Тел Авив, петмина демонстранти се уапсени според соопштението на полицијата.

Филипини денеска ја обвинија кинеската крајбрежна стража за употреба на водени топови против два филипински брода и блокирање на пристап до спорниот гребен во Јужното Кинеско Море, а Пекинг потврди дека „одбил“ чамци од островот. Кинеската крајбрежна стража повторно постави пловечка бариера од 380 метри, со што го ограничи пристапот до областа на гребенот Скарборо.

Кина слична бариера на таа локација постави во септември 2023 година. Гребенот Скарборо се наоѓа на 240 километри западно од главниот филипински остров Лузон и речиси 900 километри од кинескиот остров Хаинан, јужно од брегот на Кина, која полага право на речиси целото Јужно Кинеско Море.

Четворица полицајци загинаа, а уште толку се повредени во престрелка во градот Шарлот во американската сојузна држава Северна Каролина. Според информациите од полицијата, убиен е и напаѓачот.

Началникот на полицијата, Џони Џенингс, рече дека тројца од убиените полицајци се членови на американската оперативна група за бегалци, која ја сочинуваат полицајци од различни агенции. Полицајците биле убиени додека биле на пат да апсат осуден криминалец.

Тие возвратиле и осомничениот бил убиен во дворот.