Паркот ќе биде изграден на излезот од селото покрај магистралниот пат кој води кон Бугарија, на местото на кое се наоѓа чешма, која според приказната директно е поврзана со почетокот на најзините претскажувања. Приказната вели дека на 12-годишна возраст малата Вангелија Пандева на ведро време ја подигнал силен ветер и ја носел неколку метри. По тој настан, започнала и да претскажува.

- Го слушнала Божјиот глас дека на таму на таа чешма, денешната чешма ако се измие, ако ги измие очите ќе прогледа бидејќи Баба Ванѓа била слепа. Баба Ванѓа го направила тоа, се измила и почнала да гледа, меѓутоа да гледа без очи - вели Петар Спасов, градоначалник на општина Ново Село.

За општина Ново Село изградбата на спомен паркот ќе значи многу во збогатувањето на туристичката понуда.

- Ние како општина која сме брендирани и сите потенцијали ги насочуваме кон развој на руралниот туризам. Тука гледаме уште една можност, уште една локација како мета за посета на туристите, значи уште еден туристички локалитет - додаде градоначалникот Спасов.

Иницијативата за изградба на спомен паркот се совпаѓа со 100-годишнината од нејзиното раѓање. Вангелија Пандева - Гуштерова, во светот позната како Баба Ванѓа, родена е на 3 октомври 1911 година во Струмица, а по мажачката, до крајот на животот живеела во бугарскиот град Петрич. Почина на 11 август 1996 година.

Таа предвидела голем број настани како што се бомбардирањето на Белград во април 1941 година, смртта на бугарскиот цар Борис, скопскиот земјострес, па и сопствената и смртта на нејзиниот сопруг.

Куќата на Ванѓа во Петрич била посетувана од голем број познати личности од целиот свет, а една од нив била и Жаклина Кенеди.

Зоран Ѓорѓиев