Зеленски: Украина ќе ги поддржи сопствениците на домови при купување генератори

Украинската влада е подготвена да ги поддржи сопствениците на домови при купување генератори и други извори на енергија во услови на актуелните  руски напади врз енергетскиот систем на земјата, јави ДПА.

Претседателот Володимир Зеленски ја објави вчера оваа нова енергетска политика, по консултациите со премиерката Јулија Свириденко.

Купувањето автономно напојување треба да стане подостапно за здруженијата на сопственици на станбени згради и сопствениците на семејни куќи, рече Зеленски во својата вечерна видео порака.

Во друга бизнис програма веќе се примени 20.000 барања за субвенции за одржување и поправка на генератори.

Дополнително, половина милијарда гривни (11,6 милиони долари) во бескаматни заеми се одобрени за купување генератори, додаде тој, пренесен од германската агенција.

Меѓутоа, смета тој, побарувачката веројатно ќе биде многу поголема.

Неколку бранови руски воздушни напади од почетокот на јануари го оштетија снабдувањето со енергија на Украина до таков степен што Киев, Харков и другите градови речиси и да немаа електрична енергија или греење за време на силниот студ и мраз.

Во главниот град, повеќе од 1.100 станбени единици нема да можат да се греат до пролет. Компаниите продолжуваат со работа со користење на дизел генератори.

Државната компанија „Укренерго“, исто така, за денеска најави прекини на електричната енергија во траење од неколку часа во сите делови од земјата, пренесе ДПА.