Зеленски: Русија употреби 50 ракети, 3.270 дронови и 1.370 бомби оваа недела

Руската Федерација оваа недела употреби околу 50 ракети, повеќе од 3.270 дронови и 1.370 водени воздушни бомби против Украина, објави денеска украинскиот претседател Володимир Зеленски на својот Фејсбук профил.

„Украина никогаш не побарала војна. Се согласивме за безусловно прекинување на огнот, баравме можности за мир и самите постојано му предлагавме на светот како да ги запреме нападите од воздух, копно и море. Но, Русија е таа што постојано го забавува овој процес: манипулира, ги одложува преговорите, го тероризира нашиот народ со воздушни напади и ги ескалира нападите на фронтот. Војната продолжува само затоа што Москва не сака да ја заврши“, посочува Зеленски, пренесува Укринформ.

Претседателот на Украина наведе дека руската армија речиси секој ден извршува стотици напади врз критичната и цивилна инфраструктура на Украина.