Зеленски: Русија неделава употреби над 3.000 дронови и 1.450 авиобомби против Украина

Руските сили во текот на изминатата недела извршија масовни напади врз Украина користејќи над 3.000 беспилотни летала, повеќе од 1.450 наведувани авиобомби и 40 ракети од различен тип, објави украинскиот претседател Володимир Зеленски на својот Фејсбук-профил.

Зеленски истакна дека значителен дел од употребените дронови се од типот „Шахед“ и нагласи дека руските воени дејствија не стивнуваат, туку отворено се инвестира во продолжување на војната, што води до меѓународна дестабилизација. Според него, Украина е цел на истите дронови и балистички ракети кои се користат и во регионот на Блискиот Исток и Персискиот Залив, со што директно се загрозуваат светските пазари и се блокираат морските патишта.

– Мораме заеднички да произведуваме модерни одбранбени системи потврдени во војна. Треба да ги обединиме нашите капацитети за луѓето да живеат во мир во Европа, на Блискиот Исток и во другите делови од светот – порача Зеленски.

Тој додаде дека украински експерти веќе направиле сеопфатна проценка на одбранбените можности на Катар и развиле конкретни решенија за зајакнување на противвоздушната одбрана во тој регион.