Заврши Меѓународната ликовна колонија „Ристо Соколов Сокол 2015“

Во хотелот „Фени“ во Кавадарци синоќа заврши 10-то издание на Меѓународната ликовна колонија, која од оваа година е насловена по еден од најдобрите кавадаречки и македонски ликовни уметници, Ристо Соколов Сокол. 

На колонијата твореа 15 ликовни уметници од Србија, Бугарија, Црна Гора и Македонија. Насликани се квалитетни дела во повеке техники.

- Ристо Соколов-Сокол остави силен печат во уметничкото творење за време на неговиот живот и творечкиот опус, создаде доволно дела за да го паметат генерациите кои живееја со него и останатите кои ќе ги видат неговите слики, рече ликовниот уметник Кирил Казанџиски.

Ликовниот уметник Новица Трајковски на затворањето на колонијата, му се заблагодари на организаторот, кој традиционално како што нагласи, е одличен домаќин.

- Ристо Соколов во македонската ликовна јавност ќе остане запишан за сите времиња. Се додека постојат сеќавањата за некого тој е жив па така и нашиот Сокол живее, нагласи координаторот Трајковски.

На затворањето на колонијата и одржувањето на изложбата на делата создадени на неа, присутните го погледнаа и документарниот филм на Тони Коцев посветен на подготовката и одржувањето на последната изложба на Ристо Соколов-Сокол, во декември минатата година.

За време на досегашното одржување на колонијата, учесници беа познати уметници од целиот Балкан, но и од повеќе европски земји. Над 110 ликовни уметници твореа на колонијата, оставајќи зад себе над 250 ликовни дела кои се трајно поставени низ сите простории на хотелот.