Заев: Немаше воедначена правда ако се спореди пресудата за Саздо и пресудата за Алмир

Премиерот, Зоран Заев, од собранската говорница денеска порача дека има дискрепанца во судските одлуки во врска со убиствата на Никола Саздоски-Саздо, и малиот 4-годишниот Алмир Алиу кој беше прегазен во Куманово. Заев рече дека по пресудата за Алмир почувствувал горчина.

-Во случајот со граѓанинот Алмир и граѓанинот Саздо немаше воедначена правда. Во првиот случај обвинетиот беше осуден на 6 години затвор, а во вториот на 19. Тоа не е воедначена правда. Чувство на горчина остана кај сите. Судот мора да испраќа порака за воедначена правда за сите. Немам намера да интервенирам во судството, но преку промена на законите и дебата можеме да го подобриме – рече Заев кој зеде збор по реплика на пратеникот, Зијадин Села.