Заев и Адеми ќе ги разгледаат жалбите за финансирањето проекти од областа на културата

Премиерот Зоран Заев најави дека на денешната средба со министерот за култура Асаф Адеми ќе бидат разгледани жалбите за Годишниот конкурс за финансирање на проектите од областа на културата за 2019 година.

-Поништувањето и разгледувањето на сите незадоволни од конкурсот е нешто што го потврдивме и јас и министерот. Министерот имаше одредени здравствени проблеми, но сега е вратен. Денеска имам состанок со него за да ги разгледаме сите правно-формални аспекти за да можеме на  јавноста да и ги соопштиме следните чекори. Треба да видиме дали постои одговорност и како е направена поделбата на проектите. Тоа ќе го направиме на транспарентен начин, рече Заев во одговор на прашање по презентацијата на  Научно-технолошкиот парк во Скопје.