За една седмица на островите во Егејското Море пристигнале 2377 бегалци и мигранти

Во периодот од 26 август до 1 септември, на островите во Егејското Море пристигнале 2377 бегалци и мигранти, бројка што е повисока во споредба со една седмица претходно, но и речиси четирипати поголема споредена со истиот период лани, покажуваат податоците од УНХЦР- Грција, jави дописничката на МИА од Атина.

Според неделниот преглед на ситуацијата на островите во Егејското Море, просечните дневни пристигнувања се 340, а од 2377-те лица, мнозинството (1643) пристигнале на Лезбос. Една седмица претходно, пристигнувањата достигнале до 1768, а во истиот период, од 26 август до 1 септември 2018, само 670 бегалци и мигранти од турското крајбрежје стигнале на островите во Грција.

-Околу 25250 бегалци и мигранти престојуваат на островите во Егејското Море. Поголемиот дел се од Авганистан (43 отсто), Сирија (12 отсто) и Демократска Република Конго (10 отсто). Жени се 22 проценти од популацијата, а деца 36 отсто, од кои речиси шест од 10 се помали од 12 години. Околу 18 проценти од децата се без придружба или одвоени, главно од Авганистан. Околу 37 отсто се мажи од 18 до 39 години, пишува во неделниот извештај од УНХЦР-Грција.

Според истите податоци, на Лезбос има 11765 бегалци и мигранти, на Самос 4517, на Кос 3525, на Хиос 2844, на Лерос 2052 лица.

Од почетокот на годинава, заклучно со 1 септември во Грција пристигнале 33999 бегалци и мигранти, од кои 26078 по морски пат.