Во Штип изложба на дела на Ниче Василев

Во галеријата „Безистен“ во Штип денеска е отворена изложбата на дела од македонскиот сликар Ниче Василев. Штипската публика може да види 28 дела на Василев кој вели дека инспирацијата ја црпи од убавите жени и пејсажи.

- Јас сум среќен што сум во Штип и ова е моја петта изложба во Штип. Инспирацијата ја наоѓам секаде каде што ќе видам убави жени и пејсажи, вели Василев.

Директорот на Заводот за заштита на споменици и Музеј на град-Штип, Зоран Читкушев посочи дека со денешнава изложба се одбележуваат 40 години творештво на познатиот македонски сликар Ниче Василев, кој е од Струмица, а своето образование го стекнал во Бугарија и Полска.

- Сликите во најголем дел се масло на платно, тоа се портрети, фигури и пејсажи, рече Читкушев.

Штипската публика делата на Василев може да ги види во штипската галерија „Безистен“ во наредните 14 дена.