Во посета на Пустец шефот на мисијата на Советот на Европа во Тирана

Шефот на мисијата на Советот на Европа во Тирана, Клаус Неукирч денеска престојуваше во посета на општина Пустец, Мала Преспа.

На средбата со градоначалникот Едмонд Темелко, подетално бил запознат со положбата на Македонците во Албанија, со Предлог-законот за малцинствата, кој треба да биде изгласан во септември од новиот состав на албанскиот Парламент, како и за парламентарни избори, што во Албанија ќе се одржат на 18 јуни.

Темелко го информирал дека македонската партија МАЕИ, чиј лидер е тој, на овие избор настапува во коалиција со Движењето за социјалистичка интеграција.

На средбата присуствувале и претседателката на Советот на општина Пустец, Ирена Василовски, советници, како и Васил Стерјовски, генерален секретар на МАЕИ и единствен кандидат за пратеник од македонската партија. 

Високиот гостин ја посетил и пештерската црква на островот Мал Град.