Во недела посебен режим за движење возила околу СЦ „Јане Сандански“

Ракометниот клуб Вардар преку својата интернет страница ги информира сите гледачи кои имаат купено влезница за дуелот Вардар – Барселона дека ќе има посебен режим на движење на возилата по главните улици околу Спортскиот Центар „Јане Сандански".

Во информацијата се вели дека, според насоките на МВР, в недела од 8:00 часот наутро ќе биде забранет пристап за моторни возила околу СЦ „Јане Сандански", вклучувајќи го и паркингот до салата, а од 14:00 часот, па сѐ до крајот на натпреварот меѓу Вардар и Барселона (што почнува во 17:45), ќе биде забранет пристап на сите моторни возила во насока кон СЦ „Јане Сандански".

Ќе биде воспоставен режим со кој ќе бидат затворени булеварите коишто водат кон СЦ „Јане Сандански" – булевар АСНОМ до булевар Србија и булевар АСНОМ до булевар Јане Сандански.

Овие правила важат за сите гледачи кои планираат да го следат натпреварот Вардар – Барселона во живо, вклучувајќи ги и гледачите со ВИП влезници. Исто така нема да важат ниту пропусниците за возила кои се издадени за сезонава.

Исто така, ги замолуваме сите гледачи да дојдат најмалку час и половина пред почетокот на натпреварот поради големиот интерес.