Во Куманово заловени 35 кучиња скитници

Стручните служби во рамки на дводневната акција што ја спроведуваат тимовите на ветеринарно-сточарскиот центар „Тодор Велков“ на подрачјето на општина Куманово, заловија 35 кучиња скитници. 

 

Тендерот што го распиша општината во вредност од 800.000 денари за заловување на кучињата, го доби ветеринарно-сточарскиот центар,кој ги исполнува законските одредби, бидејќи, нагласија од секторот за инспекциски надзор, центарот поседува прифатилиште за заловените кучиња во село Четирце, согласно одредбите и правилниците од  Законот за благосостојба на животните, а имаат  и стручни тимови за третман на кучињата. Заловените кучиња се транспортираат до прифатилиштето каде што по добиениот третман по 30 дена се враќаат на локацијата од каде што се заловени.

 

- Кучињата се заловуваат во централното градско подрачје, по што ќе акцијата ќе се прошири во поширокото централно подрачје и приградските населби и ќе продолжи на територијата на градежниот опфат на Куманово, согласно динамиката која што се применува со години наназад, изјави Гордан Таневски,комунален редар од секторот за инспекциски надзор.

 

Граѓаните можат да се јават и да ги информираат надлежните за движењето на кучињата скитници во одредени населби и реони, но и можат да си вдомат куче. Акциите за заловување кучиња скитници ќе траат се додека не се потрошат средствата од тендерот. Со претходниот тендер беа заловени околу 250 кучиња.