Во Буџетот на Општина Кочани за 2019 година повеќе пари за образованието

Локалната самоуправа на Кочани во 2019 година ќе располага со буџет од близу 213 милиони денари, што е на слично ниво како во годината што изминува.

Предложениот финансиски план, без ниту една дискусија или забелешка, доби едногласна поддршка на денешната седница на општинскиот Совет, при што беше споменато дека со подобра прераспределба на средствата ќе се обезбедат повеќе пари за образованието.

-Кај приходите планираме зголемување за околу 20 милони денари што ќе се добијат како помош од државата за покривање на задолженоста на училиштата, но многу поважно е што е направена поинаква структура во распределбата на парите, со намера да се постигне поголем ефект во образованието. Од даноците и од капиталните приходи на буџетската сметка ќе влезат над 130 милиони денари, што ќе обезбеди посигурна реализација на планираните капитални инвестиции, истакна  Дејан Рашков раководител на Секторот за финансии на Општина Кочани.

Заеднички заклучок на советниците е дека и покрај сличното ниво на буџетот како за годината што изминува, финансискиот план за 2019 година може да се оцени како развоен за општината.