Во Битола почнува вакцинацијата против сезонски грип

ЈЗУ Центар за јавно здравје-Битола денес почнува со вакцинација против сезонски грип за чија реализација во оваа фаза обезбедени се 3.800 вакцини.

 

Од ЈЗУ Центар за јавно здравје-Битола информираат дека вакцинација против сезонски грип ќе се врши за населението во општините Новаци, Могила, Кичево, Демир Хисар и Ресен, односно на територијата за која има надлежност овој Центарот.

 

- За подрачјето на општините Битола, Могила и Новаци обезбедени се 2.600 вакцини, за Кичево - 700 вакцини, за Демир Хисар – 200 и за општина Ресен - 300 вакцини. Вакцината ги поседува сите потребни сертификати, стручни оценки на квалитет, како и одобрение за пуштање во промет од Бирото за лекови на Република Македонија. Вакцината е со унифицирана цена од 400 денари на целата територија на Република Македонија, истакна Елизабета Крстева, в.д. директор на ЈЗУ Центар за јавно здравје-Битола.

 

Вакцината се употребува за активна имунизација и профилакса на епидемичен грип предизвикан од вируси. Особено се препорачува кај лица со зголемен ризик за заболување од грип и можни компликации од грип.

 

- Вакцината е за лица со и над 65 годишна возраст, возрасни и деца над шест месеци со хронични заболувања на белодробниот или кардиоваскуларниот систем, вклучувајќи и деца заболени од астма, возрасни и деца над шест месеци со намален имунитет, лица на кои им е потребен постојан медицински третман или хоспитализирање заради хронични метаболни болести, цистична фиброза, ренални пореметувања, имуносупресии, но и лекари, медицински сестри, персонал во болница и останати јавни службеници, кои доаѓаат во контакт со лица со зголемен ризик од грип, посочи Крстева.

 

Од ЈЗУ Центар за јавно здравје-Битола информираат дека вакцинација против сезонски грип не треба да ја примаат лица алергични на јајца и пилешки протеини, лица со покачена температура или акутна инфекција во моментот на апликацијата на вакцината и лица со акутни влошувања на хронична болест.

 

Вакцинацијата ќе се врши секој работен ден почнувајќи во терминот од 07.30 до 18.00 часот.