Уставен суд ќе ја соопшти конечната одлука за распуштањето на Собранието

Уставниот суд на денешната седница треба да донесе конечна одлука дали одложеното распуштање на Собранието на Република Македонија е противуставно или не.

На седницата пред една недела Судот изрази сомневање за одлуката и едногласно одлучи да поведе постапка за оценување на уставноста на Одлуката за распуштање на Собранието на Република Македонија од 18 јануари 2016 година и на Одлуката за изменување на Одлуката за распуштање на Собранието од 23 февруари 2016 година. Притоа, уставните судии донесоа и времена мерка со која се запираат сите изборни дејства.

Од Судот велат дека ова значи оти актите и дејствијата што произлегуваат од овие одлуки треба да се запрат.

Парламентот истиот ден (на 18 мај) одржа седница на која беа направени повеќе измени и дополнувања на закони, меѓу кои и на Изборниот законик, со што беа одложени изборите кои беа закажани за 5 јуни.

Судијата известител Исмаил Дарлишта на седницата истакна дека оспорената одлука е противуставна, бидејќи со неа се доведуваат во прашање владеењето на правото и правната сигурност и предложи Уставниот суд да поведе постапка.

Претседателката на Уставниот суд, Елена Гошева рече дека ќе направи преседан и ќе гласа за поведување на постапка за оценување на уставноста на оспорените одлуки, имајќи ја предвид состојбата во која се наоѓа државата, која е доста специфична и во која органите се наоѓаат во функционална блокада.

Иницијативата ја поднесе пратеникот на ДУИ Талат Џафери, за која од Уставниот суд посочуваат дека има целосно нови елементи и оти за овој предмет има нова анализа.

Уставните судии во февруари годинава веќе расправаа и ја отфрлија Иницијативата на пратеникот Павле Трајанов од Демократскиот сојуз и на Тодор Петров од Светскиот македонски конгрес, за одложеното распуштање на Собранието.