УПОЗ и ЗСА: Неприфатлива Предлог-спогодбата од Министерството за правда

Синдикатот на работниците од управата, правосудните органи и здруженија на граѓани (УПОЗ) и Здружението на судска администрација денеска информираа дека за нив е неприфатлива Предлог-спогодбата поднесена од Министерството за правда.

- Во врска со штрајкот во судовите денеска Синдикатот на УПОЗ и ЗСА одржаа состанок на кој ја разгледаа Предлог-спогодбата од Министерството за правда. На состанокот беше констатирано дека неприфатлива е спогодба во која не се прецизирани рокови и спогодба која нуди обврска само за едната страна, односно Синдикатот на УПОЗ и ЗСА, се вели во соопштението.

Синдикатот на УПОЗ и на ЗСА информираат дека по денешниот состанок испратиле Предлог текст на спогодбата со сите забелешки од синдикалните организации до Министерството за правда и Судскиот совет.

Тие очекуваат во најбрз рок Министерството за правда и Судскиот совет да се произнесат и да почнат преговори за евентуалните спорни прашања од Предлог-спогодбата.

Судската администрација веќе подолг период протестира барајќи зголемување на додатоците на плата до 35 проценти како што е тоа предвидено кај судиите, јавните обвинители и јавнообвинителските службеници.