Украинците се подготвуваат за првпат да го прослават Божик на 25 декември според новиот календар

Украинците се подготвуваат да го прослават својот прв Божик според новиот календар.

Повеќето Украинци се православни христијани, а црквата во Украина се согласи да не го слави Божик според јулијанскиот календар, кој досега се празнуваше на 7 јануари.

Како што пренесуваат странските агенции, нападот на Москва во февруари 2022 година ја собра нацијата во одбрана и поттикна многу Украинци да го отфрлат рускиот јазик и култура и другите историски врски со Русија.

„Се што беше поврзано со Русија и сè што Русија правеше како нас, предизвика згрозеност кај луѓето“, вели Михаил Омелијан, православен свештеник во Киев.

Украина, исто така, го покажа својот интерес за пристапување во Европската унија, а многумина сметаат дека членството е клучна потврда за местото на Украина во Европа.

„Излегува дека Украинците ќе го слават Божик на 25 декември, како и другите Европејци“, рече Тетјана, 25-годишна верничка која додаде дека за првпат ќе го слави Божик на 25 декември.

Стоејќи пред киевскиот манастир Свети Михаил, таа посочи дека се чувствува „малку необично“, но дека тоа е „вистинската работа што треба да се направи“.