Турција ќе преземе акција ако не се повлечат екстремистите од Манбиџ

Турција ќе преземе акција доколку екстремистите веднаш не се повлечат од сирискиот регион Манбиџ и областа источно од реката Еуфрат, соопшти Советот за национална безбедност по состанок одржан во Анкара.

Турција, која минатата недела го освои реонот на сирискиот град Африн по двомесечна офанзива против Силите за заштита на народот на сириските Курди, повеќепати се закани дека своите операции ќе ги прошири кон исток до Манбиџ каде се стационирани и американски трупи.

Ширењето на турската воена офанзива на многу поголема територија која е под контрола на Курдите на исток, што турскиот претседател Тајип Ердоган вети дека ќе го направи, би довело до ризик од конфронтација меѓу сојузниците од НАТО, кои се во спор околу американската политика во Сирија и други прашања, предупредуваат аналитичарите.