Тркалезна маса „Патот на Северна Македонија до ЕУ: Предизвици и можности во 2025“

Во организација на Академијата за европска интеграција (АЕИ) денеска ќе се одржи панел тркалезна маса на тема „Патот на Северна Македонија до ЕУ: Предизвици и можности во 2025“.

Како што информираат од Академијата, модератор на настанот ќе биде директорот на АЕИ во Скопје, Васко Наумовски, а  обраќања ќе имаат амбасадорот на Австрија во Скопје Мартин Памер, основачот и претседател на Меѓународниот одбор на АЕИ во Скопје Габриел Лански, како и претседателот на АЕИ Арлинд Зеќири.

Предавачи на панел дискусијата, пак, од АЕИ велат ќе бидат експерти и практичари во областа на интеграцијата и Европската унија, односно судијката во Европскиот суд на правдата, како и поранешна министерка за правда во Австрија Мариа Бергер, поранешниот директор на Југоисточна Европа и проширување на ЕУ при Министерството за надворешни работи на Австрија, Клаус Воелфер, замен-министерката за европски прашања во Северна Македонија Викторија Трајков, како и е Герхард Јарош, раководител на меѓународно кривично право во ЛГП Груп и поранешен заменик-главен обвинител во Виена.