Трамп се надева дека Израел и Иран ќе постигнат договор

Американскиот претседател Доналд Трамп изјави дека се надева оти Израел и Иран ќе можат да постигнат договор, но понекогаш, како што рече, земјите прво мора да се борат за него.

Во разговор со новинарите пред заминувањето за самитот на Г-7 во Канада, Трамп рече дека САД ќе продолжат да го поддржуваат Израел, но одби да каже дали побарал од земјата да ги прекине нападите врз Иран.

-Се надевам дека ќе има договор. Мислам дека е време за договор и ќе видиме што ќе се случи. Понекогаш тие мора да се борат, но ќе видиме што ќе се случи, рече Трамп.

Претходно вчера, тој напиша на својот профил на социјалните мрежи, Truth Social, дека „Иран и Израел мора да постигнат договор и дека ќе постигнат“, додавајќи дека „наскоро ќе имаме мир“.

Во меѓувреме, Израел и Иран повторно се нападнаа едни со други, убивајќи и ранувајќи цивили и изразувајќи загриженост за поширок конфликт во регионот.