Трамп: Разочаран сум, Зеленски не е подготвен да го потпише мировниот предлог на САД

Американскиот претседател Доналд Трамп синоќа, по тридневните разговори меѓу Вашингтон и Киев во Флорида, изјави дека украинскиот претседател Володимир Зеленски „не е подготвен“ да го потпише мировниот предлог на САД, чија цел е да се стави крај на војната со Русија, објави CNN.

„Малку сум разочаран што претседателот Зеленски сè уште не го прочитал предлогот, тоа беше пред неколку часа. На неговиот народ му се допаѓа, но тој не го направи тоа“, рече Доналд Трамп во разговор со новинарите во неделата вечерта.

Трамп додаде дека верува оти Русија се согласува со предложениот договор, но дека не е сигурен дека Зеленски се согласува со предлогот.

Рускиот претседател Владимир Путин јавно не го одобри планот на Белата куќа, а американските претставници Стив Виткоф и Џаред Кушнер се сретнаа со него во Кремљ минатата недела, но не успеаја да постигнат јасен напредок.

Од друга страна, преговорите меѓу американските и украинските претставници завршија во саботата без никаков очигледен напредок, а Зеленски ги нарече разговорите „конструктивни, иако не лесни“, наведува „Гардијан“.

Коментарот на Трамп дојде пред денешната средба на Зеленски во Лондон со премиерот на Велика Британија Кир Стармер и лидерите на Франција и Германија за продолжување на разговорите меѓу САД и Украина.