Трамп го откажа учеството на традиционалната годишна средба со медиумите

Претседателот на САД, Доналд Трамп изјави дека нема да присуствува на годишната вечера на Асоцијацијата на дописниците, акредитирани во Белата куќа. 

Трамп на Твитер ја објави одлуката да не учествува на настанот, планиран за 29 април, на кој традиционално присуствуваат познати личности, политичари и новинари.

Тој им посака на учесниците на настанот се најдобро и добар помин. 

Односите меѓу Трамп и медиумите се затегнаа, откако тој ги нарече „непријатели на народот“ и често пати ги критикува медиумите и конкретни новинари, чии известувања не му се доапаѓаат.

Традицијата за таа вечера е основана во 1921 година и на неа претседателите имаат можност да одржат говор, полн со самокритичност, но и со можност да упатат критики до своите политички ривали.

Во 2011 година Трамп присуствуваше на вечерата и беше предмет на потсмев од тогашниот претседател Барак Обама.