Традиционалниот словенечки појадок одбележан во Скопје под мотото „Мојот избор е словенечка храна“

Амбасадата на Република Словенија во Скопје, во партнерство со Меѓународните училишта NOVA и Земјоделскиот институт на Македонија, го одбележа годинашниот Традиционален словенечки појадок под слоганот „Мојот избор е словенечка храна“.

Како што информираат од Амбасадата, настанот е дел од националната словенечка иницијатива за подигнување на свеста кај младите за здравата исхрана, важноста на редовниот и балансиран појадок и придобивките од локално произведената храна.

-Посебно внимание привлече едукативната игра „Buzzing Future“, создадена од Словенечката амбасада во Копенхаген во соработка со UN Global Pulse и партнерските организации. Преку интерактивен пристап, децата учеа за климатските промени, глобалните предизвици и улогата на пчелите како симбол на еко - системската рамнотежа. Играта им помогна на учениците да размислуваат критички и креативно за последиците од човечките одлуки и за можните решенија за одржлива иднина. Настанот официјално го отвори директорот на NOVA, Иван Новаковски, а присутните ги поздрави и амбасадорот на Република Словенија во земјава Грегор Прескер, кој ја истакна важноста од промовирање здрави животни навики, локалната храна, улогата на земјоделството и пчеларството, како и потребата од одговорно управување со отпадот и пакувањата, стои во соопштението.

Во рамките на програмата, Земјоделскиот институт одржал едукативна сесија. Претставничката Марија Ѓошева Ковачевиќ и пчеларот Марјан Арсов презентирале кратко предавање и квиз за хранливата вредност на медот и значењето на редовниот и здрав појадок. Тие ги охрабриле децата да го препознаат медот како важна храна со бројни придобивки.

Преку активности и практични демонстрации, настанот ги поттикнал младите да научат повеќе за важноста на редовниот и балансиран појадок, изборот на здрави и локално произведени намирници, улогата на земјоделството, пчеларството и прехранбената индустрија, заштитата на животната средина и правилното постапување со отпад.