Традиционален божикен ручек за 500 деца во Прилеп

Традиционален божикен ручек за околу 500 деца, в сабота во хотелот „Кристал палас“ во Прилеп, ќе организира Детската амбасада за сите деца во светот.

Божикниот ручек, како што објасни Александра Северкоска Стојаноска, извршен директор на Детската амбасада, ќе се одржи по 11 пат.

На Божик од 12 часот во хотелот „Кристал палас“ во Прилеп 500 деца од цела Македонија ќе се дружат на свечен божикен ручек и ќе го слават Хриството раѓање. На заедничката трпеза ќе седнат деца без родители, децата на загинатите бранители, деца со посебни потреби како и деца, членови на детската амбасада.

- Децата се од Прилеп, Скопје, Ресен, Тетово, Битола, Струмица и од други градови. Според мотото „Едно небо за сите деца“, на Божикниот ручек се поканети и деца од другите верски заедници од исламската, од католичката, од евресјаката и од евангелско-методистичката верска заедница, рече Северкоска Стојаноски.

Божикниот ручек ќе го благослови владиката Петар, а градоначалникот на Прилеп Марјан Ристески на децаата ќе им додели новогодишни пакетчиња.

Годинава по осми пат Детската амбасада за сите деца во светот го доделува престижното признание за општествена одговорност - Орден за носител на мирот, а заедничкиот празничен ручек за децата ќе биде збогатен со програма.

- Признанието „Орден за носител на мирот“ годинава го доделуваме на „ЕЛЕМ“-Скопје. За збогатување на свеченоста, ќе се погрижат членовите на Академијата за естрадно пеење „Ѕвездички“ од Прилеп, македонскиот претставник во „пинковите ѕвездички“, Мина Блажев, учесничката на детската Евровизија Магдалена Алексовска, како и ѕвездичките Сара Гигова и Љупка Арсовска. За весела забава ќе се погрижат и македонскиот идол Христијан Тодоровски и Ален Хасановиќ, рече Северкоска Стојаноски.

Плакета за пријател на децата, Детската амбасада ќе додели на „Алкалоид“ од Скопје, хотелот „Инекс Горица“ од Охрид и на Христијан Тодоровски.