Судски процес против германска неонацистка за 10 убиства

Единствената преживеана од германската неонацистичка група, која меѓу 2000 и 2007 година уби осуммина Турци, еден Грк и една припадничка на германската полиција, денеска ги отфрли наводите на обвинителството.

Како што јави дописникот на МИА од Берлин, на првиот ден од судењето на групата, која во име на нацистичката идеологија уби најмалку 10 луѓе, обвинетата Беате Цепе во Судот во Минхен изјави дека не учествувала во убиствата.

Цепе денеска го прекина две и полгодишниот молк што трае од нејзиното апсење пред 30 месеци.

Пред Судот Цепе изјави дека „не била инволвирана ниту во подготовките, ниту во спроведувањето на убиствата“.

Покрај за убиствата, на Цепе и се суди и за подметнување на најмалку две бомби во центри за бегалци, како и за 15 грабежи на банки. Цепе се соочува со казна доживотен затвор.