Со полициски патроли ќе се регулира јавниот ред и мир во Карпош

Градоначалникот на општина Карпош Стевчо Јакимовски, претставници од полициската станица Карпош и претседателите на урбаните заедници денеска дискутираа за нарушувањето на јавниот ред и мир на граѓаните во летниот период.

На состанокот беше презентирана Програмата на полициската станица Карпош за преземање на превентивни мерки против нарушување на јавниот ред и мир. Присутните ја потенцираа потребата од зачестена полициска патрола на територија на општината.

- Општина Карпош преку целата година, а посебно во летниот период, се соочува со сериозни проблеми, како оштетување на општинските и државните објекти, сето она што е обезбедено и потрошено со народните пари. Во исто време граѓаните се жалат дека во раните утрински часови се соочуваат со викотници и несоодветно однесување, информира Јакимовски.

Имаме разбирање за потребите на младите, истакна тој, затоа сме се потрудиле да обезбедиме и одредени катчиња за нив.

По тој повод, командирот на полициската станица Карпош Роберт Петрушевски го презентираше планот во кој се поместени зачестени полициските патроли низ општината, во доцните часови.

- Општината ја поделивме на три сектори. Секој сектор ќе има по една патрола, или по двајца полициски службеници, но би сакале да присуствува и по еден претставник од урбаните заедници, рече Петрушевски. Информира дека се предвидени позачестени патроли и покривање на места, укажани од страна на граѓаните и од страна на вработените лица во урбаните заедници во општина Карпош. Во истата патрола ќе бидат вклучени инспектори, како и службеници на МВР од Одделот за малолетничка деликвенција и вработени во СВР Карпош.