Синдикатот на европските пилоти против идејата за „летови со помал екипаж“
Европската пилотска асоцијација се изјасни против идејата на „Ербас“ за автоматизирани авиони со само еден пилот при лет, оценувајќи дека авиоиндустријата става „фокус на комерцијалните интереси пред безбедноста“.
Според првиот човек на европскиот пилотски синдикат, Отјан де Брајн, новата технологија со зголемена автоматизација на авионите на која инсистира авиоиндустријата, само ќе ја зголеми нивната крајна цена, на сметка на безбедноста на леталата.
Станува збор за иницијатива на „Ербас“ наречена „летови со помал екипаж“, со која се предлага промена на регулативата во ЕУ со што би се овозможило авионите да летаат само со еден пилот, а автоматизираната технологија во суштина да ја има улогата на копилот. Дополнително, според предлогот на „Ербас“, кај летовите на долги релации, наместо тројца, би имало само двајца пилоти.
Според сегашните правила, како што јави дописникот на МИА од Брисел, во пилотската кабина постојано мора да има по двајца пилоти. Затоа на подолгите летови, авионите имаат тројца пилоти за да се обезбеди во секој момент пред кокпитот да бидат двајца од нив, додека третиот би можел да одмара.
„Ербас“ смета дека неговата технологија е доволно софистицирана за да овозможи еден пилот сам да управува со напредни авиони при летот. Според компанијата, на вакви летови би оделе само „искусни пилоти, кои би биле подложени на медицински тестови за доказ на нивната подготвеност“.
Но, Де Брајн не се согласува со ваквиот предлог, оценувајќи дека лет со „помалку од двајца пилоти е незамислив дури и со најсофистицираната технологија што е достапна во моментов“.
– Нашите процедури, меѓусебната соработка, начинот на кој ние како пилоти се проверуваме за време на нашата работа, се причината за високото ниво на безбедност. Отстранувањето на еден дел од целината ќе го наруши целиот систем, вели Де Брајн.
Според него, технологијата може да откаже и тогаш одговорноста е на пилотите.
– Со намалување на бројот на пилоти, ги намалувате шансите тие пилоти да можат да решат такви проблеми, смета првиот европски синдикалец.
За стравувањата на Де Брајн, „Ербас“ оцени дека „пилотите ќе останат во сржта на летовите“, а автоматиката ќе игра „клучна улога како помош во пилотската кабина и намалувајќи го обемот на работа“ на пилотите.
– Посветени сме на пионерски нови решенија кои ќе продолжат да ги поддржуваат летачките екипажи и да обезбедуваат зголемени нивоа на безбедност, посочи „Ербас“.
Според компанијата, во догледна иднина авионите ќе претставуваат „робустен и флексибилен систем со соодветна автоматизација во која централната улога ќе ја има добро одморен и компетентен пилот“.
Идејата во моментов е на разгледување пред Агенцијата за воздухопловна безбедност на ЕУ (ЕАСА), која засега ја отфрла можноста за „летови со еден пилот“ пред 2030 година, поради „технолошката незрелост“.
Според ЕАСА, за да се одобрат „летови со еден пилот“ авиопроизводителите „ќе треба да докажат дека нивоата на безбедност ќе бидат исто толку високи, како и при сегашните операции со два пилоти“.
– Најважно е да се сфати дека безбедноста не смее да биде загрозена, посочува ЕАСА.
Но, Де Брајн смета дека наместо да изрази „загриженост“ за овој предлог на „Ербас“, ЕАСА прави „се што може за да ги забрза сертификацијата и донесувањето нови правила“.
Според Де Брајн, ЕАСА станала „премногу блиска“ со производителите на авиони за да може да носи независни проценки.
ЕАСА ги отфрла ваквите обвинувања, истакнувајќи дека соработката со авиоиндустријата „се реализира според принципите на транспарентност и репрезентативност“.
– ЕАСА е обврзана со многу строг етички кодекс и секоја инсинуација за премногу блиски односи со производителите на авиони и авиокомпаниите ја отфрламе како без фактичка основа, посочи Агенцијата.
Ново на Сител
-
КФОР формира кордон на Ибарскиот мост во Митровица
-
Српско МНР: Меѓународната заедница итно да го заштити српскиот народ на Косово
-
Стано: Последните еднострани акции на Приштина на север ризикуваат натамошна ескалација
-
Приведен осомничен крадец во радовишко
-
Силвио Мировски е светски првак во кик бокс
-
МОН: Над 1 000 образовни асистенти во новата учебна година ќе бидат поддршка на учениците со попреченост
-
Деветнаесет маратонци денеска ќе пливаат на 37. Охридски пливачки маратон
-
Ѓоковиќ: Го играв најлошиот тенис на УС Опен, без енергија, понекогаш се чувствував како аматер