Симовски: Ние сме статистичари а не полицајци за да знаеме кој попишувач се занимава со криминал

Ние сме статистичари, а не полицајци за да знаеме дали некој од пријавените попишувачи се занимава со криминал, изјави за Плусинфо директорот на Државниот завод за статистика (ДЗС), Апостол Симовски, откако вчера портпаролот на опозициската ВМРО-ДПМНЕ посочи дека еден од попишувачите во Сарај е уапсен во полициската акција „Планина“.

Тој истакна дека изборот на попишувачи се врши преку јавен конкурс и дека Законот за попис дозволува да се пријави секој што ги исполнува условите.

– Како ние да знаеме дали некој попишувач се занимава со нелегална работа? Сите заинтересирани граѓани доброволно се пријавуваат на јавниот конкурс за попишувачи, а условот е да се наши државјани, да се полнолетни, да имаат завршено средно образование и да немаат засновано редовен работен однос. Впрочем, ние овие луѓе ги ангажираме привремено, а не ги вработуваме. Зарем треба да го испрашуваме секој попишувач посебно? Ние сме статистичари, а не полицајци – истакна Симовски.