Штип почнува со одбележувањето на празникот Свети Никола

Штип од вечерва почнува со чествувањето на празникот Свети Никола, кој е патрон на градот. Советникот за култура во Општина Штип, Кирил Панајотов денеска истакна дека програмата за одбележување на празникот почнува вечерва со концерт на Градскиот хор во Мултимедијалниот центар „Киро Глигоров“ со почеток во 19 часот.

-Главниот настан ќе се случи утре 18 декември, со почеток во 17 часот со празничната вечерна литургија во соборниот храм „Свети Никола“, во чии рамки околу 18 часот ќе се одржи Свечената академија, каде што традиционално градоначалникот на Општина Штип ќе ги врачи признанијата и орденот Свети Никола, вели Панајотов.

Во моментов не се открива добитникот на орденот, граѓаните на Штип ќе го дознаат на Свечената академија. Инаку утревечер ќе се промовира и книгата „Житија и чудеса на Свети Јован Битолски-Шангајски чудотворец“ и химната на манастирот Свети Гарвил Лесновски во Лесново.

-На 19 декември, среда програмата продолжува со светата архиерјска литургија во соборниот храм „Свети Никола“, вели Панајотов.

Се очекува оваа година со неа да чиноначлствува поглаварот на МПЦ-ОА господин господин Стефан, по што ќе има и литија,  а на Градскиот плоштад „Слобода“ ќе се дели славскиот колач.