Самопрогласената мини држава Либерланд отвори претставништво во Белград

Самопрогласената мини држава Либерланд, што ја фомираше Чехот Вит Једличка на „ничија земја“ меѓу Хрвтска и Србија, денеска го отвори своето претставништво во Белград. 

„Претседателот на Либерланд“, Једличка истакна дека целта на неговата „држава“ е да биде фактор за поврзување на народите и се надева дека претставништвото ќе привлече повеќе луѓе да дојдат во Србија и во Либерланд. 

Једличка изрази задоволство што српското Министерство за надворешни работи има позитивно мислење за Либерланд од самиот почеток, за разлика од Хрватска.

- Хрватска мисли дека сме некаква шега, виц. Много е забавно да создадеш нова држава, но ние не сме шега и ќе го докажеме тоа, изјави Једличка на прес-конференцијата по повод отворањето на претставништвото.

Тој рече дека голем број луѓе посакале да побараат државјанство во Либерланд. 

Једличка на 13 април 2015 година прогласи создавање на „Слободна Република Либерланд", која се наоѓа на остров на реката Дунав меѓу Србија и Хрватска со површина од седум километри квадратни.

Тој најави дека Либерланд е подготовен да им даде државјанство на секој, кој не се „комунист, неонацист, екстремист или осуден за тешки кривични дела“.