Русите го кренаа степенот на подготвеност на лансирните системи што можат да носат нуклеарно оружје

Јарс РС-24 е стратегиски нуклеарен проектил со дострел до 12.000 километри и распон на прецизност од 250 метри. Може да се постави на камиони носачи или да се распореди во силоси.

Од почетокот на конфликтот во Украина во февруари 2022 рускиот претседател Владимир Путин предупредува на ескалациите со западното оружје од земјите кои го поддржуваат Киев.

Путин минатиот месец најави промени на руската нуклеарна доктрина за околностите во кои Москва би можела да употреби нуклеарно оружје. Промените вклучуваат можност за негова употреба против држави кои имаат поддршка од нуклеарни сили, што може да се однесува на Украина доколку Вашингтон ѝ одобри користење на оружје со долг дострел за гаѓање длабоко во руска територија.