Путин уверен во победата во Украина во својата новогодишна порака

Рускиот претседател Владимир Путин изрази увереност во победа во Украина во својата новогодишна порака, по речиси четири години исцрпувачка војна.

– Им ја честитам Новата година на нашите борци и команданти! Веруваме во нив и во нашата победа, рече Путин, според текстот на снименото видеообраќање објавено во средата од страна на државните медиуми.

Пораката првпат беше емитувана на далечниот источен полуостров Камчатка, каде што 2026 година почна во 12:00 часот по Гринич.

Војниците, кои Украина ги обвинува за воени злосторства, Путин уште еднаш ги нарече „херои“.

– Милиони луѓе ширум Русија, ве уверувам, се со нив оваа новогодишна ноќ. Тие мислат на нив, сочувствуваат со нив и се надеваат на нив. Обединети сме во нашата искрена, несебична и лојална љубов кон Русија, рече Путин.

Во пораката не се спомнуваат преговори со Соединетите Американски Држави за ставање крај на војната ниту надеж за мир, пренесе ДПА.

Земјата, „големата Русија“, ќе ги постигне своите цели, рече Путин.

Неговата новогодишна порака се емитува на полноќ во секој регион поради различните временски зони во земјата.

Последни во 2026 година влегуваат луѓето во Калининград на Балтичкото Море во 22:00 часот по Гринич. Празнично украсениот главен град Москва слави во 21:00 часот по Гринич.

МИА