Проект за подобро управување со квалитетот на воздухот

Јакнење на капацитетите за ефективна имплементација на европското право во областа на квалитетот на воздухот е целта на твининг проектот финансиран од ЕУ што денеска ќе биде промовиран во Скопје. 

Проектот е со времетраење од 21 месец, ќе се спроведува од мај 2015 до јануари 2017 година, а финансиската поддршка од 1,1 милион евра е обезбедена преку ИПА. 

Активностите се насочени кон зајакнување на административните капацитети во областа на управувањето со квалитетот на воздухот и влијанието на загадувањето врз здравјето согласно соодветното европско право. 

Проектот ќе им помогне на корисниците да ги направат неопходните реформи и подобрувања за спроведување на законодавството за квалитетот на воздухот, да ги зајакнат капацитетите во однос на мониторингот на квалитетот на воздухот, управувањето со податоци и изготвувањето извештаи. Ќе бидат усовршени инвентарите на емисии и проекциите за различните сектори, вклучително и дисперзионо моделирање како поддршка при подготовката на оценки за квалитетот на воздухот. Ќе се вложат големи напори во развојот на планот за подобрување на квалитетот на воздухот, вклучувајќи и идентификување мерки за подобрување на квалитетот на воздухот на локално ниво. Проектот вклучува и активности за подобрување на проценките на влијанието на загадувањето на воздухот врз здравјето.

На промоцијата ќе се обратат евроамбасадорот Аиво Орав, министерот за животна средина и просторно планирање Нурхан Изаири и почесниот конзул на Финска Светозар Јаневски. Одржанба ќе биде и сесија на која експертите ќе дискутираат за епизоди со високи концентрации на загадувачки супстанци кои се јавуваат особено во текот на зимата, како и нивното влијание врз популацијата.