Припадници на АРМ учествуваат во меѓународната вежба „Анаконда 2016“

Припадници од неколку единици на Армијата на Република Македонија заедно со армиите од 23 земји од НАТО и Партнерството за мир (ПЗМ) од денес ги започнуваат активностите на меѓународната вежба „Анаконда-16“.

Вежбата ќе трае до 17 јуни и ќе се изведува на неколку локации во Република Полска.

Почетокот на вежбата беше означен со свечена церемонија во националниот одбранбен универзитет во Варшава и на местата каде се стационирани единиците.

Меѓународната вежба „Анаконда-16“ е меѓу најголемите вежби организирани во Европа во последните неколку децении, со учество на 31.000 војници од сите видови и родови на Армиите на земјите од НАТО и ПЗМ.

Армијата на Република Македонија учествуваат со 157 припадници во состав од пешадиска чета, вод на воена полиција, припадници од полкот за специјални операции и штабен персонал.

- Интероперабилноста, соработката меѓу земјите членки на НАТО и ПЗМ, како и градење на меѓусебна доверба за заедничко учество во меѓународни здружени операции е една од главните цели на изведување на оваа вежба во организација на Армијата на Соединетите Американски Држави во Европа и Вооружените Сили на Република Полска. Со учеството на оваа голема здружена вежба АРМ како и досега покажува дека е оспособена за спроведување на НАТО стандардите и оперативните процедури и рамноправно да учествува во секаков вид на сложени вежби и операции за поддршка на мирот и безбедноста заедно со партнерските земји членки на НАТО, се вели во соопштението од АРМ.