Претставници на АХВ ќе посетат фарма во село Петровец

Претставници на Агенцијата за храна и ветеринарство (АХВ) денеска ќе посетат краварска фарма во скопското село Петровец.

Стручни лица од Секторот за здравствена заштита и благосостојба на животните ќе ги презентираат условите што треба да ги исполнат фармите од аспект на благосостојбата на животните како битен услов за производство на безбедно и квалитетно млеко, додека претставници од Секторот за јавно ветеринарно здравство ќе ја презентираат актуелната состојба во производството на млеко во Македонија.

Фармата во Петровец ќе ја посетат и деца од градинката „Кокиче“ од скопската општина Кисела Вода, за изворно да се запознаат со процесот на производство на млеко.

Посетата е во рамки на кампањата „Од нива до трпеза, од фарма до вилушка - безбедна храна за македонските граѓани“ за едукација на децата за безбедноста на храната и исхраната, која ја спроведува Агенцијата за храна и ветеринарство.