Преглед на вестите од светот

Во Србија стапи во сила 48-часовен изборен молк пред вонредните парламентарни избори во недела. Анкетите на јавното мислење покажуваат дека Студентската листа и листата Обединета Србија предводена од СНС на Александар Вучиќ се во тесна трка за победа на изборите. Синоќа двата табора ги одржаа своите завршни предизборни митинзи на различни локации во главниот град, привлекувајќи огромен број поддржувачи.

Бугарската новинарка Соња Колтуклиева заврши во болница со потрес на мозок и скршено рамо откако припадник на Националната служба за обезбедување брутално ја турна на земја. Инцидентот се случи пред седиштето на владејачката партија Прогресивна Бугарија, додека таа се обидуваше да ѝ постави прашање на претседателката на бугарското Собрание, Михаела Доцова.

Новинарката сакала да добие одговор од Доцова за одложувањето на парламентарните сослушувања за контроверзните помилувања кои биле потпишани од актуелната претседателка Илијана Јотова додека била потпретседателка. Јотова ја презеде претседателската функција по оставката на Радев во јануари годинава.

Сега Јотова е актуелен фаворит и главен кандидат на владејачката партија Прогресивна Бугарија на претседателските избори кои ќе се одржат за два дена. Националната служба за обезбедување, чиј припадник ја повреди новинарката, е под директна надлежност на претседателската институција.

Опозициските партии побараа итна оставка од шефот на Националната служба за обезбедување и од претседателката на парламентот, нагласувајќи дека државните гардисти се однесуваат како партиска милиција за заштита на „Прогресивна Бугарија“.

Од друга страна, „Прогресивна Бугарија“ и Јотова порачаа дека опозицијата се обидува да го искористи немилиот настан за да ја дестабилизира владата непосредно пред гласањето во недела.

Според анкетите, главен противкандидат на Јотова е Андреј Ѓуров, кој е поддржан од прозападната опозиција. Главна тема во изборната кампања беа темите поврзани со безбедноста, војната во Украина и односите со Русија. На изборите учествуваат 27 кандидати, а се очекува излезноста да биде под 40 проценти.

„Ќе гласам за претседател кој е независен и неоптоварен. Некој што е чесен, има докажана историја на интегритет и верува во европската иднина на Бугарија.“

„На 25 октомври ќе гласам за претседател кој е интелигентен, хуман и ја знае насоката за развој на Бугарија.“