Предновогодишен концерт на Воениот оркестар на Армијата и музичари од Романија

Во свечената сала на Македонската филхармонија вечерва ќе се одржи традиционалниот предновогодишен концерт на Воениот оркестар на Армијата, збогатен со настап на музичари од оркестарот на Вооружените сили на Романија.

Концертот, организиран од Министерството за одбрана и Генералштабот на Армијата, кој ќе се одржи под мотото „Заедно посилни во хармонија на звуците“ ќе понуди репертоар со дела од светски реномирани композитори, како и композиции од македонски и романски автори.

На настанот, како што информнираат од АРМ, ќе присуствуваат претседателката и врховен командант на Вооружените сили Гордана Сиљановска-Давкова, заменик-претседателот на Владата Љупчо Димовски, министерот за одбрана Владо Мисајловски, началникот на Генералштабот генерал-мајор Сашко Лафчиски, министри, пратеници, претставници на дипломатскиот и воено-дипломатскиот кор, како и активни и пензионирани генерали.

Концертот претставува континуитет на соработката меѓу Воениот оркестар на Армијата и оркестрите од сојузничките армии, кои заеднички настапуваат и создаваат музички мостови на пријателство.

Граѓаните ќе можат да го проследат концертот во живо на Првиот канал на Македонската радио-телевизија од 20:00 часот.

МИА