Ползењето е исклучително битно за здрав ран развој на детето

Ползењето (познато и како лазење) е исклучително важно за здравиот ран развој на детето, бидејќи вклучува истовремена координација на повеќе телесни и мозочни функции. Стручњаците нагласуваат дека преку лазењето, децата ги зајакнуваат своите мускули, развиваат координација, рамнотежа и просторна свест, но тоа, исто така, ги поттикнува когнитивните способности и социјалните вештини.

Истражувањата покажуваат дека детското ползење игра незаменлива улога во здравиот развој на најмалите. Така, лазењето не е само првиот чекор кон самостојното одење, туку и клучна способност што ги поврзува телото и мозокот, поставувајќи ја основата за целокупен физички и когнитивен развој.

Развој на моторни вештини: Лазењето ги зајакнува мускулите на рацете, нозете, грбот и телото воопшто, што е основа за подоцнежно одење, трчање и други моторни вештини. Тоа помага во развојот на фини моторни вештини, бидејќи детето учи да ги координира рацете и прстите додека ги допира и истражува предметите.

Координација рака - око: Додека лази, детето ги усогласува движењата на рацете и нозете со она што го гледа. Оваа координација подоцна помага, на пр. при пишувањето, фаќање предмети и спортски вештини.

Развој на мозокот: Ползењето вклучува вкрстена координација (раката и спротивната нога се движат истовремено), што ја поттикнува комуникацијата меѓу двете мозочни хемисфери. Ова ги подобрува когнитивните способности, планирањето на движењата и просторното снаоѓање.

Развој на рамнотежа: Детето кое лази, учи да го контролира телото во просторот, и така развива чувство за рамнотежа и свест за положбите на сопственото телото.

Независно истражување и учење: Со лазење, детето ја истражува околината, што ја поттикнува љубопитноста, решавањето проблеми и независноста.

Недостатокот на лазење може да доведе до лоша координација, проблеми со рамнотежата и моторни тешкотии подоцна во животот. Некои истражувања го поврзуваат пропуштањето на фазата на лазење со доцнење во развојот на фините моторни и когнитивните вештини.

МИА