Почнува Охридскиот хорски фестивал

Од денеска до 28 август во Охрид по десетти пат ќе се одржи Охридскиот хорски фестивал. 

Свеченото отворање на фестивалот, кој е во организација на Охридскиот хор, ќе биде вечерва во хотелот Инекс Горица, по што во 21:00 часот ќе следува настап во центарот на Охрид. 

На фестивалот ќе учествуваат 24 хорови од десет европски земји. Фестивалот има ревијален и натпреварувачки дел кој опфаќа неколку категории.

Пријавените хорови ќе се претстават на натпреварувачките концерти, концертите на духовна музика, поп и фолк.

Жири комисијата ја сочинуваат Алицја Шелуга од Полска, Аљоша Новаковиќ од БиХ, Запро Запров од Македонија, Јасенка Остојиќ од Хрватска и Илија Рајковиќ од Србија.

Концертите од фестивалот ќе се одржуваат во  Дијамантската сала на хотелот Инекс Горица и католичката црква Св. Кирил и Методиј.