Почна изградба на пат од Калањево до Бела Вода

Општина Неготино вчера официјално започна со изградба на патниот правец од селото Калањево до излетничкото место Бела Вода.

- Станува збор за изградба на линиска патна инфраструктура која ќе обезбеди полесен и посигурен пристап до ова излетничко место кое е посетувано како од граѓани на општина Неготино, така и од жители на други градови од Македонија, се наведува во соопштението на општината.

Вредноста на работите изнесува 15.000.000 денари, средства обезбедени од Агенцијата за поддршка на земјоделството  и руралниот развој на Република Македонија, додека средствата за данокот на додадена вредност ги обезбедува локалната самоуправа Неготино.

Според локалните власти со реализација на овој проект ќе се изгради модерен и современ пат од Калањево до Бела вода,  кој ќе гарантира и поголема сигурност на сите учесници во сообраќајот кои се упатуваат кон ова излетничко место.