Почна да се гради патот Росоман-Сирково

Почна да се гради локалниот пат од Росоман до село Сирково, во должина од околу 4 километри. Како што информираше денеска Ѓорѓи Крстевски, портпарол во Локална самоуправа Росоман, земјените работи и уредувањето на пропустите како и првичната подлога ќе бидат финансирани од Бирото за регионален развој и росоманската општина, со околу шест милиони денари.

- Дополнително ќе се распише тендер за втората фаза од изградбата на патот која ќе се финансира од Светска банка преку  Министерството за финансии со околу 33 милиони денари. 15.990.000 денари се од Светска банка, а останатиот дел од средствата се обезбедени преку локалниот буџет, соопшти Крстевски.

Тој нагласи  дека со оваа инвстиција  ќе се скрати дестинацијата од Росоман до Сирково, а новиот пат ќе биде поврзан и со новата делница Градско-Прилеп, која е во фаза на изградба.

- Инвестирањето во овој пат значи и побрз, полесен и побезбеден пристап до земјоделските имоти во овој регион, додаде Крстевски.