Песков: Путин ќе ја информира јавноста ако прими вакцина против коронавирусот

Рускиот претседател Владимир Путин лично ќе објави доколку одлучи да ја прими вакцината против коронавирусот, изјави денеска портпаролот на Кремљ, Дмитриј Песков.

– Доколку смета дека е неопходно, ќе ја информира јавноста за тоа, изјави Песков.

На 11 август Русија стана првата земја во светот што регистрираше вакцина против коронавирусот и ја именуваше Спутник V, а меѓу јавните личности кои веќе ја примиле вакцината се министерот за одбрана Сергеј Шојгу, градоначалникот на Москва Сергеј Собјанин и лидерот на Либерално-демократската партија на Русија, Владимир Жириновски, како и белорускиот премиер Роман Головченко.

Во средината на август, Путин објави дека вакцина примила и една од неговите ќерки.