Основање локален економско-социјален совет во Општина Свети Николе

Во рамки на Проектот за унапредување на социјалниот дијалог, финансиран од Европската Унија (ЕУ), а спроведуван од Меѓународната организација на трудот (МОТ) денеска ќе се основа локален економско-социјален совет во Општина Свети Николе.

Третиот локален економско-социјален совет (ЛЕСС) во рамки на проектот, во Општина Свети Николе, ќе има консултативно-советодавна функција, ќе разгледува прашања и ќе дава мислења, предлози и препораки до Советот на општината и други органи за одредени прашања од економско-социјалната сфера.

Потписници на спогодбата за основање на овој совет ќе бидат градоначалникот на Општина Свети Николе, Зоран Тасев, претседателот на Сојузот на синдикати на Македонија, Живко Митревски, претседателот на Организацијата на работодавачи на Македонија, Ангел Димитров и в.д. претседателот на Конфедерацијата на слободни синдикати на Македонија, Благоја Ралповски. Во ЛЕСС Свети Николе ќе партиципираат и претставници од Центарот за вработување на Општина Свети Николе, средното училиште во Општина Свети Николе, Меѓународниот Славјански универзитет, Здружението на земјоделци од Свети Николе, Организацијата на жени – Свети Николе, како и од невладините организации и здруженија на граѓани. 

Целта на проектот е подобрување на трипартитниот и бипартитниот социјален дијалог како начин за постигнување економски развој и социјален напредок.

Во рамки на првата компонента, проектот го поддржува основањето на шест локални економско-социјални совети (ЛЕСС), преку иницирање и поддршка на  преговори помеѓу општините, синдикатите и работодавачите, потпишување спогодба за основање на ЛЕСС и опремување на секретаријатите на  ЛЕСС со мебел и компјутерска опрема.